Hujumchi Viktor Osimxen Italiyaning «Yuventus» klubiga o‘tishni xohlamoqda.
Jurnalist Alfredo Pedullaning ma’lumotiga ko‘ra, «Al-Ahli» va «Al-Hilol» klublarining qiziqishiga qaramay, futbolchi Saudiya Arabistonida o‘ynashni istamayapti. «Al-Hilol» uni yillik 30–35 million yevro maosh bilan ta’minlashga tayyor edi.
Avvalroq, turinliklar Osimxen uchun «Napoli»ga bonuslarni qo‘shib hisoblaganda 85 million yevro taklif qilishga tayyor ekani haqida ham xabarlar tarqalgan.
Futbolchi «Yuventus»ni birinchi o‘ringa qo‘yayotgani aytilmoqda, chunki u sport direktori Kristiano Juntoli bilan yana hamkorlik qilishdan mamnun bo‘lar edi. Hozircha nigeriyalik hujumchi turinliklar bilan muzokaralarni kutmoqda.
Osimxenning «Napoli» bilan amaldagi shartnomasi 2026 yil 30 iyungacha mo‘ljallangan. Joriy mavsumda u «Galatasaroay» safida ijara asosida o‘ynadi va Turkiyada 38 o‘yinda 33 ta gol urdi.