“An-Nasr”ning portugaliyalik yulduz hujumchisi Krishtianu Ronaldu muxlislar talqiniga ko‘ra, Saudiya Arabistoni chempionatining 2024/2025 yilgi mavsumining eng yaxshi futbolchisi deb topildi. Bu haqda turnir matbuot xizmati ijtimoiy tarmoqlarda xabar bermoqda.
Mavsum davomida Ronaldu 15 marta o‘yinlarning eng yaxshi futbolchisi bo‘lgan. U Saudiya Arabistoni Pro-ligasida 30 ta o‘yin o‘tkazib, 25 ta gol urdi va shu tariqa turnirning eng yaxshi to‘purariga aylandi.
Bundan tashqari, Pro-Liganing 27-turidan o‘rin olgan “Ar-Riyod”ga (2:1) qarshi o‘yinda 40 yoshli Krishtianu jarima maydonchasi chizig‘i ustidan to‘pni darvozaga yo‘llab, kiritgan to‘p muxlislar tomonidan Saudiya Arabistonida 2024/2025 yilgi mavsumning eng yaxshi goli deb topildi. Shu tariqa, Ronaldu mavsum yakunlariga ko‘ra uchta shaxsiy sovringa ega bo‘ldi.
“An-Nasr” mavsumni uchinchi o‘rinda yakunladi, chempionlik “Al-Ittihod”ga nasib etdi, ikkinchi o‘rinni esa “Al-Hilol” egalladi.