O‘zbekiston U-17 terma jamoasi bosh murabbiyi Islom Ismoilov Qatarga qarshi bo‘lib o‘tgan uchrashuvi haqida o‘z fikrini bildirdi.
“13 martdan boshlab Qatarda yig‘in boshlaganmiz. Bugun Qatarga qarshi o‘rtoqlik o‘yinini o‘tkazdik. Bu jamoa Osiyoning eng yaxshi jamoalaridan biri hisoblanadi.
Bu Osiyo kubogiga tayyorgarlik yo‘lidagi asosiy o‘yinlarimizdan biri bo‘ldi. Osiyo chempionatining 1-turida Tailandga qarshi qanday o‘ynashimiz kerakligini sinovdan o‘tkazish uchun Qatarga qarshi bahsda maydonga tushdik. Umuman olganda, futbolchilar ikkila bo‘limda ham yaxshi harakat qilishdi. Lekin o‘zimizga yarasha xato va kamchiliklarimiz bor.
Quvontiradigan tomoni esa, hujumda golli vaziyatlarimiz ko‘p bo‘ldi va biz ularni golga aylantira oldik. Lekin, bugun gol o‘tkazmagan bo‘lsak-da, kamchiliklar ko‘zga tashlandi. Osiyo kubogigacha hali oldimizda 2 hafta vaqt bor. Bu vaqt mobaynida qolgan kamchiliklarni ham to‘g‘rilashga harakat qilamiz”, — dedi Ismoilov.
Ma’lumot o‘rnida. U17 Osiyo kubogi 3-20 aprel kuni Saudiya Arabistonida bo‘lib o‘tadi. O‘zbekiston o‘smirlar terma jamoasi “A” guruhida Tailand (3 aprel), Saudiya Arabistoni (6 aprel) va Xitoy (9 aprel)ga qarshi bahslarda ishtirok etadi. Chorak finalga chiqqan 8 jamoa Jahon chempionati yo‘llanmasini qo‘lga kiritadi.