Italiyalik murabbiy Simone Indzagi yaqin orada Saudiya Arabistonining “Al-Hilol” klubi bosh murabbiyiga aylanishi kutilmoqda.
U soliqlar to‘langanidan so‘ng yiliga 26 million yevro maosh oladi. Bu haqda jurnalist Fabrisio Romano ijtimoiy tarmoqda xabar berdi.
Manbalarga ko‘ra, 49 yoshli mutaxassis “Al-Hilol” bilan 2027 yil iyunigacha mo‘ljallangan shartnoma imzolaydi. Avvalroq Romano Indzagi shu hafta klub bilan rasman kelishuvga erishishini ma’lum qilgan edi.
Eslatib o‘tamiz, Simone Indzagi 2021 yildan beri “Inter” klubida ishlab kelayotgan edi. U jamoa bilan birga Italiya chempioni bo‘ldi, ikki marta mamlakat Kubogini, uch marta Superkubokni qo‘lga kiritdi va ikki marta Chempionlar Ligasi finaligacha yetdi.