«Barselona» bosh murabbiyi Xans-Diter Flik matbuot anjumanida Tyago Alkantaraning murabbiylar shtabiga qayta qo‘shilgani haqida fikr bildirdi.
«Men Tyagoning qaytganidan juda xursandman. Bu xabar butun jamoa va shtabni ham quvontirdi. Uni ko‘ndirish oson bo‘lmadi – bunda uning turmush o‘rtog‘i Xuliya ham katta rol o‘ynadi. Uning katta tajribasi bor va bu tajribani yosh futbolchilarga yetkazib berishga qodir. U bizning muvaffaqiyatimizda muhim bo‘lakka aylanishi mumkin», – dedi Flik jurnalistlarga.
Eslatib o‘tamiz, 2024 yil yozida ham Tyago Flik shtabiga qo‘shilgan edi, ammo o‘sha vaqtda hamkorlik faqat bir oy davom etgan.
Futbolchi sifatida Tyago «Barselona» safida 100 o‘yin o‘tkazgan, 11 gol urgan va 19 golli uzatma amalga oshirgan.