Londonning “Chelsi” klubi so‘nggi 10 yil ichida o‘yinchilarni sotishdan tushgan foyda bo‘yicha birinchi o‘rinni egalladi. Bu haqda Transfermarkt xabar berdi.
Manbaga ko‘ra, “ko‘klar” transferlar bo‘yicha 1 milliard 440 million yevro ishlab topgan. Ikkinchi o‘rinda “Manchester Siti” 922 million, “Liverpul” esa 690 million bilan uchinchi o‘rinda.
Shuningdek, kuchli o‘ntalikka “Everton” (636 million), “Aston Villa” (622), “Sautgempton” (610), “Lester” (602), “Tottenxem” (576), “Manchester Yunayted” (545) va “Vulverxempton” (531) ham kirgan.
Nashr qilingan yangiliklarda 465 million ko‘rsatkich bilan bor-yo‘g‘i o‘n uchinchi o‘rinda turgan “Arsenal”ga alohida e’tibor qaratilgan. Portal ekspertining fikricha, bunga klub murabbiylari Arsen Venger va Unai Emeri qo‘l ostida olib borilgan noto‘g‘ri moliyaviy siyosat sabab bo‘lgan.