Oliy Majlis Senati Raisi Tanzila Narboyeva Jenevaga rasmiy tashrifi doirasida Xalqaro mehnat tashkiloti (XMT) Bosh direktori janob Jilber Ungo bilan uchrashdi.
Muloqot davomida munosib mehnat tamoyillarini tizimli tatbiq etish, Ijtimoiy adolat uchun global alyans doirasida XMT bilan hamkorlik qilish va istiqboldagi rejalar muhokama qilindi.
Ta’kidlash joizki, mamlakatimizda aholi o‘rtasida qashshoqlikni kamaytirish va farovonlikni oshirishga qaratilgan dastur amalga oshirilgan va bu dasturda xalqaro mehnat tashkiloti tomonidan tavsiya etilgan standartlar hisobga olingan.
Shuningdek, barqaror mehnat tizimini takomillashtirishda qonunchilikdagi islohotlarning ahamiyati inobatga olinib, parlament hokimiyati va vakolatlaridan samarali foydalanish yuzasidan fikr almashilmoqda.