O‘zbekiston Respublikasi Prezidenti Shavkat Mirziyoyev Rossiya Federatsiyasi Hukumati Raisi Mixail Mishustin boshchiligidagi delegatsiyani qabul qildi.
O‘zbekiston va Rossiya hukumat rahbarlari qo‘shma qo‘mitasining beshinchi yig‘ilishi doirasida Rossiya delegatsiyasi mamlakatimizda bo‘lib turibdi.
Uchrashuv avvalida janob Mixail Mishustin Rossiya Federatsiyasi Prezidenti Vladimir Putinning mamlakatimiz rahbariga samimiy salomi va ezgu tilaklarini yetkazdi.
Muzokaralar chog‘ida O‘zbekiston va Rossiya o‘rtasidagi ko‘p qirrali hamkorlik, har tomonlama strategik sheriklik va ittifoqchilik munosabatlarini yanada kengaytirish masalalari muhokama qilindi.
Rossiya Prezidentining joriy yil 26-28 may kunlari O‘zbekistonga davlat tashrifi chog‘ida qabul qilingan qaror va kelishuvlar ijrosini ta’minlashga alohida e’tibor qaratilmoqda.
Shu ma’noda, qo‘shma qo‘mitaning kecha bo‘lib o‘tgan navbatdagi yig‘ilishining samarali natijalari yuqori baholandi.
Savdo sur'atlarini saqlab qolish, sanoat, energetika, qishloq xo'jaligi, transport va iqtisodiyotning boshqa ustuvor tarmoqlaridagi kooperatsiya loyihalarini qo'llab-quvvatlash va jadallashtirish bo'yicha muvofiqlashtirilgan chora-tadbirlar ko'rish zarurligi ta'kidlandi.
Davlat rahbari mintaqaviy miqyosda amaliy hamkorlikni yanada mustahkamlash, jadal madaniy-gumanitar almashinuvlarni davom ettirish, migratsiya sohasida samarali hamkorlikni yo‘lga qo‘yish muhim ekanini ta’kidladi.
Bundan tashqari, uchrashuvda tomonlarni qiziqtirgan masalalar yuzasidan fikr almashildi.