O‘zbekiston Vazirlar Mahkamasi “Davlat pensiya ta’minoti tizimini isloh qilish konsepsiyasini ishlab chiqish bo‘yicha tashkiliy chora-tadbirlar to‘g‘risida”gi qarorni qabul qildi.
Qarorga muvofiq, pensiya ta’minoti tizimidagi mavjud muammolarni tahlil qilish hamda ilg‘or xorijiy tajribadan kelib chiqib, pensiya ta’minoti tizimining barqarorligini ta’minlash va ijtimoiy adolatni mustahkamlash bo‘yicha takliflar tayyorlash bo‘yicha ishchi guruh tashkil etildi.
Ishchi guruhga Bosh vazir o‘rinbosari, iqtisodiyot va moliya vaziri Jamshid Qo‘chqorov boshchilik qilmoqda. Bu guruhga Iqtisodiyot va moliya vazirining birinchi o‘rinbosari, kambag‘allikni qisqartirish va bandlik vaziri, Soliq qo‘mitasi raisi, adliya vazirining o‘rinbosari va Prezident saroyining ikki nafar mas’ul xodimi kiradi.
2025-yil 1-martga qadar ishchi guruh davlat pensiya taʼminoti tizimini isloh qilish konsepsiyasi loyihasini ishlab chiqishi va taqdim etishi lozim.
Ishchi guruh belgilangan vazifalarni bajarishda ishtirok etish uchun vazirliklar, idoralar, ilmiy va ta’lim tashkilotlari, xalqaro tashkilotlar ekspertlarini, mahalliy va xorijiy ekspertlar hamda maslahatchilarni taklif etishga haqli.