“O‘zbekiston temir yo‘llari” aksiyadorlik jamiyati sayyohlik oyligida ichki yo‘nalishlarga chipta sotib oluvchi keksalar uchun chegirmalar e’lon qildi. 1-30 noyabr kunlari 55 yoshdan oshgan ayollar va 60 yoshdan oshgan erkaklar barcha ichki yoʻnalishlarda 20% chegirmaga ega.
Kompaniya maʼlumotlariga koʻra, ushbu aksiya “Afrosiyob” tezyurar poyezdiga taalluqli emas.
Chiptalarni shaxsni tasdiqlovchi hujjatlar (pasport yoki shaxsiy guvohnoma) ko‘rsatilgan holda “O‘ztemiryo‘lyo‘li” korxonasi kassasidan xarid qilish mumkin.
O‘zbekiston Respublikasi Vazirlar Mahkamasining 2020-yil 28-maydagi “Keksalarni davlat tomonidan qo‘llab-quvvatlash tizimini yanada takomillashtirish to‘g‘risida”gi qaroriga asosan har yili noyabr oyida keksalar uchun turizm oyligi o‘tkaziladi.
Oylik doirasida keksalar va imkoniyati cheklangan insonlarni har tomonlama qo‘llab-quvvatlash, ularning bo‘sh vaqtini mazmunli o‘tkazish, yurtimizning diqqatga sazovor joylariga sayohatlar tashkil etishga qaratilgan turli loyihalar amalga oshirilmoqda.