Rossiya prezidenti Vladimir Putin Gruziya fuqarolarining Rossiyaga kirish va chiqish tartiblarini soddalashtiruvchi farmonni imzoladi. 10-oktabrda e’lon qilingan hujjat fuqarolarning ayrim toifalari uchun vizasiz rejimni kengaytiradi.
Yangi farmonga ko‘ra, endilikda Gruziya fuqarolari Rossiyaga vizasiz nafaqat qisqa muddatli sayohatlar, balki ishlash yoki vaqtincha bo‘lish, jumladan, ta’lim olish uchun ham 90 kundan ortiq muddatga kirishlari mumkin. Ilgari fuqarolarning ushbu guruhi cheklangan viza imtiyozlariga ega edi.
Farmon e’lon qilingan paytdan e’tiboran kuchga kiradi. Gruziya fuqarolari Rossiyaga Gruziya fuqarosining pasporti, diplomatik yoki rasmiy pasporti, dengizchi kitobi yoki Gruziyaga qaytish uchun sayohat hujjati kabi haqiqiy shaxsni tasdiqlovchi hujjatlar asosida sayohat qilishlari mumkin.
Bu qaror ikki davlat oʻrtasidagi migratsiya oqimiga sezilarli taʼsir koʻrsatishi va Rossiyada ishlash yoki oʻqishni istagan koʻplab Gruziya fuqarolarining hayotini osonlashtirishi mumkin.