AQSh huquq-tartibot idoralari Oklaxoma shtatida 5 noyabr kuni umumxalq saylovi kuni terakt uyushtirish niyatida bo‘lgan Afg‘oniston fuqarosini qo‘lga oldi. Bu haqda AQSh Adliya vazirligi xabar berdi. 2021-yil sentabrida AQShga immigratsiya vizasi bilan kirgan 27 yoshli Nazir Ahmad Tavhedi “Islomiy davlat” guruhiga moddiy yordam koʻrsatishga uringan jinoiy fitnada ishtirok etgan. U o‘qotar quroldan foydalangan holda AQShda terrorchilik harakatini amalga oshirish niyatida bo‘lgan. Federal Qidiruv Byurosi (FQB) direktori Kristofer Reyning aniqlik kiritishicha, Tavhedi teraktni 5-noyabrdagi umumiy saylov kuni amalga oshirishni rejalashtirgan. 7 oktabr kuni AQSh “Islomiy davlat” bilan “aloqadorligi” sababli uch kishini Rossiya va Tojikistonga deportatsiya qilgani xabar qilingan edi.
