O‘zbekiston elchisi Abdusalom Xatamov Ummonning OQ kompaniyasi direktorlar kengashi raisi Mulkhim al-Jaraf bilan uchrashdi, deb xabar berdi “Dunyo” axborot agentligi.
Suhbat chog‘ida O‘zbekiston bilan Ummon o‘rtasidagi munosabatlarning bugungi holati va istiqbollari, mamlakatimizga xorijiy sarmoyalarni jalb etish, mazkur kompaniyaning mamlakatimizda qo‘shma loyihalarni amalga oshirish imkoniyatlari muhokama qilindi.
Ummon vakiliga O‘zbekistonda sarmoya sohasida amalga oshirilayotgan islohotlar, xorijiy investorlar uchun yaratilgan qulay shart-sharoitlar va taklif etilayotgan loyihalar haqida ma’lumot berildi.
“OQ” kompaniyasi direktorlar kengashi raisi O‘zbekistonda amalga oshirilayotgan iqtisodiy islohotlar, yaratilgan qulay sarmoyaviy imkoniyatlar va xorijiy investorlarga berilayotgan imtiyozlarni yuqori baholadi. Shuningdek, u taklif etilayotgan sarmoyaviy loyihalarga ham qiziqish bildirdi.
Uchrashuv yakunida tomonlar qo‘shma loyihalarni amalga oshirish masalalarini muhokama qilishni davom ettirishga kelishib oldilar.
OQ kompaniyasi nafaqat Ummonda, balki Osiyo-Tinch okeani, Yaqin Sharq, Yevropa va Amerika mintaqalarida ham neft va gaz qazib olish bilan shug'ullanadi. U neft-gaz sohasida faoliyat yurituvchi 9 ta yirik korxonani birlashtiradi.