AFP mahalliy hukumat maʼlumotlariga tayanib, Vetnamdagi “Yagi” toʻfoni qurbonlari soni 143 kishiga yetganini xabar qildi. Yana 58 kishi bedarak yo‘qolgan.
Shimoliy Vetnamdagi to‘satdan suv toshqini butun bir qishloqni olib ketganidan keyin qurbonlar soni keskin oshdi. Natijada kamida 16 kishi halok bo‘ldi, o‘nlab odamlar bedarak yo‘qoldi. Qishloq xoʻjaligi vazirligi maʼlumotlariga koʻra, noqulay ob-havo tufayli 210 ming gektarga yaqin ekin maydonlari nobud boʻlgan. 700 dan ortiq odam jabrlangan.
“Yagi” super to‘foni 1-sentabr kuni Janubi-Sharqiy Osiyoga yetib keldi. Bundan tashqari, Filippin, Xitoy va Gonkongda ham odamlar halok bo‘ldi. Filippindagi tabiiy ofatlar natijasida yetkazilgan zarar 27,57 million dollarga baholanmoqda.