Prezident Shavkat Mirziyoev 10-sentabr kuni Toshkent shahrining Yangi O‘zbekiston ko‘chasidagi qurilish va obodonlashtirish loyihalari bilan tanishdi, deb xabar qildi Prezident matbuot xizmati.
Davlatimiz rahbarining 2022-yil 30-iyundagi qarori asosida Yangi O‘zbekiston ko‘chasida savdo markazi qurish va bu yo‘lda infratuzilmani rivojlantirishga qaror qilindi. Shunga ko‘ra, direktorlar kengashi tuzilib, arxitektura konsepsiyasi ishlab chiqildi.
Loyihaga ko‘ra, yo‘lning ikki tomonida milliy ruhga hamohang zamonaviy turar-joy massivlari, mehmonxonalar, savdo majmualari va xizmat ko‘rsatish shoxobchalari barpo etiladi. Istirohat bog‘lari va dam olish maskanlari, piyodalar va velosiped yo‘llari tashkil etiladi.
Bu yerda “Toshkent-Sharqi” aeroporti va Olimpiya shaharchasi ham barpo etilmoqda. Prezidentimiz mazkur inshootlar atrofidagi atrof-muhit va ularga olib boruvchi yo‘llarni ko‘kalamzorlashtirish bo‘yicha ko‘rsatmalar berdi.
Mazkur tashrif davomida bu boradagi landshaft dizayni bo‘yicha takliflar ko‘rib chiqildi. Unga ko‘ra, Yangi O‘zbekiston yo‘lining ikki tomoni obodonlashtiriladi. Manzarali oʻsimlik sifatida chinor, eman, lola, katalpa, pisardiya, sarv, hind nastarini, lavanda, suriya atirgul kabi daraxt va butalar oʻstiriladi. Aeroport oldida ikkita favvora o‘rnatiladi. Umuman olganda, bu hudud Toshkentning “yashil belbog‘i”ga kiradi.
Davlat rahbari landshaft kompozitsiyasi bo‘yicha o‘z tavsiyalarini bildirdi. Bu yerda ekologiya, sifat va madaniyat uyg‘unlashishi kerakligini ta’kidladi.