Mustaqilligimizning 33 yilligini nishonlash tadbirlari 23 avgust kuni respublika bo‘yicha 213 ta manzilgohda boshlandi va 31 avgustga qadar davom etadi, deb xabar qildi IIV axborot xizmati.
Mazkur tadbirlarda jamoat tartibini saqlash va xavfsizlikni ta’minlash maqsadida 16 832 nafar ichki ishlar organlari, 4 677 nafar Milliy gvardiya xodimlari, Favqulodda vaziyatlar vazirligining 1 943 nafar xodimi va harbiy xizmatchilari hamda 7 ming 244 nafar jamoatchilik vakillari ishtirok etdi.
Xodimlarga 3 037 ta metall detektor, 1 587 ta avtomashina, 7 881 ta aloqa vositalari va 267 ta hidlovchi itlar ajratilgan.
Bayram tadbirlarini o‘tkazuvchi obyektlarga 2107 ta videokuzatuv kameralari o‘rnatilib, ularning 452 tasi hududiy ichki ishlar organlariga birlashtirilib, onlayn monitoring yo‘lga qo‘yildi.
396 ta avtoturargoh festival tadbirlari oʻtkaziladigan joydan 150 metr uzoqlikda joylashgan.
Bundan tashqari, avtotransport vositalarining to‘g‘ridan-to‘g‘ri kirib kelishiga yo‘l qo‘ymaslik uchun festival tadbirlari, xalq yarmarkalari o‘tkaziladigan joylarda temir panjaralar, beton to‘siqlar va brezentlar o‘rnatiladi.
Zarur hollarda ayrim ko‘chalarda harakat cheklanishi munosabati bilan aylanma yo‘llar tashkil etiladi.
Bu hududlarga faqat rasmiy avtomashinalar kirishi mumkin.