Germaniyaning Vayssenxaus shahrida “2025 Freestyle Chess Grand Slam” musobaqasida yarim final bosqichi yakuniga yetdi.
Javohir Sindarov va Fabiano Karuana o‘rtasidagi to‘qnashuv naq 7 partiya davom etdi. Klassik formatdagi ikki o‘yin durang bilan yakunlangach, tomonlar dastlab rapid formatida (10+10) ikkitadan o‘yin o‘tkazishdi. Ularda ham durang qayd etildi.
Keyin navbat blis formatiga berildi (5+3). Ularning dastlabkisida Sindarov g‘alaba qozondi. Javob o‘yinida hamyurtimizni durang ham qanoatlantirardi. O‘yin so‘ngida Sindarov hatto g‘alaba qozonish uchun yaxshi imkoniyatga ega bo‘ldi. Ammo vaqt juda qisqaligida u aniq yurishni topa olmadi va himoyadagi Farzinini olislarga olib ketib qoldi. Farzin himoyaga qayta olmagach, Karuana g‘alaba qozondi va hisobni tenglashtirdi.
“Armagedon” partiyada esa Sindarovga oq donalar tushdi va unga g‘alaba qozonish vazifasi qo‘yildi (qoralarni durang ham qanoatlantiradi). Ammo Javohir bu ishni eplay olmadi. Natijada AQSHlik sportchi finalga yo‘l oldi. Unga Vinsent Keymer raqiblik qiladi.
Sindarov esa 3-o‘rin uchun Magnus Karlsenga qarshi dona suradi. Abdusattorov esa 5-o‘rin uchun Xikaru Nakamuraga to‘qnash keladi.
Eslatib o‘tamiz, musobaqaning mukofot jamg‘armasi — 750.000 dollarga teng. G‘olib shaxmatchiga 200.000 dollar beriladi. Finalchi 140.000 dollarga ega bo‘lsa, 3-o‘rin egasiga 100.000 beriladi. 4-o‘rin egasi 60.000, 5-o‘rinni qo‘lga kiritgan shaxmatchi esa 50.000 dollar bilan uyga qaytadi.