O‘zbekiston elchisi Farrux Tursnov Ispaniyaning Galisiya avtonom hududiga tashrif buyurdi.
Safar davomida u Galisiya avtonom hamjamiyatini boshqaruvchi rasmiylar va yetakchi kompaniyalar rahbariyati bilan uchrashuvlar o‘tkazdi.
Galisiya avtonom hamjamiyati prezidenti maslahatchisi Diyego Kalvo bilan uchrashuvda ispan tomoni O‘zbekistonda amalga oshirilayotgan islohotlar ko‘lamini yuqori baholadi va ikki tomonlama munosabatlarni mustahkamlashga tayyor ekanini bildirdi. Qishloq xo‘jaligi, yengil sanoat, avtomobilsozlik, neft-kimyo, farmatsevtika, shuningdek, turizm va mehnat migratsiyasi kabi sohalardagi hamkorlik masalalariga alohida e’tibor qaratilmoqda.
Galisiya prezidentining maslahatchisi O‘zbekiston bilan hamkorlik aloqalarini o‘rnatishdan manfaatdor ekanini tasdiqladi. Ayniqsa, Toshkentdan Madridga to‘g‘ridan-to‘g‘ri aviaqatnovlar ochilishini hisobga olgan holda, mamlakatning turizm salohiyatini rivojlantirish bo‘yicha kelishuvga erishildi.
Inditex kompaniyasi bosh direktori Oskar Garsiya bilan muzokaralar chog‘ida to‘qimachilik sanoatida qo‘shma ishlab chiqarishni tashkil etish imkoniyatlari muhokama qilindi. O‘zbekiston tomoni sanoatning raqobatbardosh afzalliklari, jumladan, resurs salohiyati, rag‘batlantirish va logistika imkoniyatlarini taqdim etdi. O‘zbekistondagi zamonaviy korxonalar barqaror ishlab chiqarish texnologiyalariga ega quvvatlarni yaratishga qaratilgan buyurtmalar berish va tajriba loyihalarini ishlab chiqish uchun taklif etilgan.
Inditex rahbariyati O‘zbekistonda logistikani optimallashtirish va ishlab chiqarish tannarxini kamaytirish imkonini beradigan markaz tashkil etish orqali yetkazib berish zanjirini kengaytirishdan manfaatdorligini bildirdi. Ispaniya tomoni, shuningdek, O‘zbekiston barqaror to‘qimachilik mahsulotlarini ishlab chiqarish bo‘yicha istiqbolli bozor hisoblanishini ta’kidladi.
Tashrif doirasida Oʻzbekiston elchisi Rodriguez Lopez avtomobilsozlik kompaniyasi bosh direktori janob Xose Enrike Rodriges bilan uchrashdi. Muhokamaning asosiy mavzusi O‘zbekistonda shoshilinch tibbiy yordam tizimini rivojlantirish bo‘ldi.
Korxona qo‘shni davlatlarga mahsulot eksport qilish imkoniyatiga ega bo‘lgan zamonaviy tibbiy asbob-uskunalarni birgalikda ishlab chiqarishni tashkil etish bo‘yicha tajriba loyihasini amalga oshirishdan manfaatdorligini bildirdi.