Arab nashrlari xabariga qaraganda, Saudiya Arabistoni milliy jamoasi a’zolari Yevropa sari otlanishmoqda.
Kutilishicha, yanvar oyida hujumchi Ayman Yahyo Ispaniya La Ligasiga yo‘l oladi. Shuningdek, yana bir hujumchi Abdulloh Radifni «Milan»da ko‘rishimiz mumkin. Darvozabon Navaf al Aqidiy esa faoliyatini Belgiyaning «Anderlext» yoki «Bryugge» klubida davom ettiradi. Saudiya Arabistoni hukumat jamg‘armasi ayni payt mahalliy futbolchilarni Yevropa ligalarida o‘ynashlarini ta’minlash bo‘-yicha ulkan reja tayyorlamoqda. Unga ko‘ra, 2025 yilning yozgi transferlar vaqti yana 6-8 nafar saudiyalik Yevropa klublari safini to‘ldiradi. Loyihadan ko‘zlangan asosiy maqsad – 2-3 yil ichida Yevropada o‘ynaydigan saudiyalik futbolchilar sonini 20-30 nafarga yetkazish.
Yevropa klublarida to‘p surayotgan saudiyalik futbolchilar
Saud Abdulhamid – yozda 2,5 million yevro evaziga «Roma» safiga o‘tgan qanot himoyachisi hozircha «A» seriyada debyut qilmadi. Lekin YELda «Atletik» va «Elfsborg»ga qarshi kechgan o‘yinlarda maydonga tushdi.
Faysal al G‘amdiy – «Al-Ittihod» tomonidan joriy yil 1 sentyabr kuni ijara safariga yuborilgan yarim himoyachi «Beerschet» (Belgiya) klubining 6ta o‘yinida maydonga tushib, 1ta assist qayd etdi.
Marvan al Sahafiy – Faysal bilan Belgiya chempionatiga yo‘l olgan hujumchining ishlari chakki emas – 6ta o‘yinda 4ta gol. SamvelKarlenovich kanalida qo‘shimcha qilinishicha, hozirda unga Shveysariyaning «Bazel» va Polshaning «Legiya» klublari qiziqmoqda. Shuningdek, «Tottenxem» vakillari ham Marvan bilan aloqaga chiqishgani aytilmoqda.
Yana bir xabar – Saudiya Arabistoni chempionatining bir qator klublari xorijlik futbolchilarga maosh to‘lash borasida muammoga uchramoqda. Jurnalist Romen Molinaning ta’kidlashicha, Ikkinchi divizion ishtirokchilari – «Al-Oruba, «Al-Xolud», «Al-Safa» kabi jamoalarda maosh to‘lovi bo‘yicha kechikish bor. Ma’lum qilinishicha, shartnoma bo‘yicha tegishli pul olmagan legionerlar FIFAga shikoyat yozish haqida o‘ylashmoqda. Ma’lumot uchun, hozirda «Barselona»ning sobiq yarim himoyachisi Kristian Telyo «Al-Oruba»da o‘ynayotgan bo‘lsa, Kataloniya jamoasining yana bir sobiq vakili Aleks Kolyado «Al-Xolud» sharafini himoya qilmoqda.