Fransiya prezidenti Emmanuel Makron 12-dekabr, payshanba kuni Polshaga tashrif buyuradi va u yerda Polsha bosh vaziri Donald Tusk bilan Ukrainadagi mojaroni muhokama qilishni rejalashtirmoqda. Bu haqda Yelisey saroyi ma’lum qildi.
“Davlat rahbari Donald Tusk bilan Ukrainani yangi transatlantik kontekstda Yevropa tomonidan qoʻllab-quvvatlash masalasi, shuningdek, 2025-yilning birinchi yarmida Polshaning YeI kengashiga raisligi boʻyicha muzokaralar olib boradi”, — deya taʼkidlaydi RIA Novosti xabarida.
Polsha bosh vazirligining aniqlik kiritishicha, Fransiya prezidenti AQShning saylangan prezidenti Donald Tramp va Vladimir Zelenskiy bilan yaqinda boʻlib oʻtgan “qisqa, ammo muhim” uchrashuvi davomidagi muzokaralar natijalarini baham koʻrish niyatida.
Tusk avvalroq Polshaning Yevropa Ittifoqiga raisligi siyosiy manzara qanday ko‘rinishi uchun javobgar bo‘lishini aytgan edi. Shu bilan birga, u Ukraina bo‘yicha tinchlik muzokaralari shu qishda boshlanishi mumkin, degan fikrni bildirdi.
Eslatib oʻtamiz, Tramp, Makron va Zelenskiy oʻrtasidagi uchrashuv 7-dekabr kuni Parijda boʻlib oʻtgan, taʼkidlanishicha, u 20 daqiqa davom etgan. Muzokaralardan keyin siyosatchilar yakuniy bayonot bermadi.