Saylovda 13 nafar nomzod ishtirok etmoqda. Oxirgi so‘rov natijalariga ko‘ra, ularning hech biri birinchi turda g‘alaba qozonish uchun zarur bo‘lgan ovozlarni to‘play olmaydi.
Birinchi turda favorit – Ruminiyaning amaldagi bosh vaziri, sotsial-demokrat Marchel Cholaku. Uning asosiy raqibi o‘ta o‘ngchi Ruminiya Birlashgan Alyansi (AUR) partiyasi rahbari Jorj Simion.
AFP xabariga ko‘ra, Simionning reytingi Ruminiyada rekord darajadagi inflyatsiya fonida keskin oshgan. Saylov kampaniyasi davomida Jorj Simion Ruminiya bilan chegaradosh Ukrainadagi urush haqida qayta-qayta gapirdi. Simion Vladimir Putinni “harbiy jinoyatchi” deb atagan, biroq ayni paytda Ukrainaga qurol-yarog‘ berilishiga qarshi.
Simion, shuningdek, Rossiya razvedka xizmatlari bilan aloqada bo'lganlikda ayblangan va u «Ruminiyadagi eng antirossiya partiyasini» boshqarganini da'vo qilgan.
Bundan tashqari, AUR rahbari o'zining yevroskeptik qarashlari bilan ham tanilgan. Simion Ruminiya va Moldovani birlashtirish tarafdori. Kishinyov rasmiylari uning Moldovaga kirishini bir necha bor taqiqlagan.
Agar birinchi turda hech bir nomzod kerakli ovozlarni to‘play olmasa, prezidentlik saylovining ikkinchi bosqichi 8 dekabr kuni bo‘lib o‘tadi. Bundan tashqari, 1 dekabr kuni Ruminiyada parlament saylovlari o‘tkazilishi kutilmoqda.