Rossiya Federatsiyasi Bosh prokurori Igor Krasnov MDHga aʼzo davlatlar Bosh prokurorlarining Muvofiqlashtiruvchi kengashini (CCGP) isloh qilishni taklif qildi. Bu haqda u O‘zbekiston bosh prokurori Nig‘matilla Yo‘ldoshev bilan Toshkentda bo‘lib o‘tgan uchrashuvda ma’lum qildi, deya xabar beradi “RIA Novosti”.
Uning fikricha, umumiy chaqiriq va tahdidlarga tezroq javob berish uchun islohotlar zarur.
“Oʻylaymanki, Bosh prokurorlarning Muvofiqlashtiruvchi kengashini isloh qilish vaqti keldi. Assotsiatsiyamiz yanada samarali faoliyat ko‘rsatishi va zamonamizning umumiy chaqiriq va tahdidlariga, jinoiy ko‘rinishlarga tezkorlik bilan javob berishi uchun assotsiatsiya kotibiyatini Hamdo‘stlikka a’zo mamlakatlarning barcha Bosh prokuraturalari vakillaridan iborat tarkibda kengaytirishni taklif qilaman”. – dedi Krasnov.
Bosh prokurorning soʻzlariga koʻra, bu oʻzgarishlar uyushmaning barcha ishtirokchilariga foyda keltiradi. Uning qoʻshimcha qilishicha, sohaviy hamkorlik organlari vakillari, jumladan, moliya razvedkasi va soliq organlari vakillarining yigʻilishlarda ishtirok etishi kengash ishining amaliy samaradorligini oshirishga xizmat qiladi.
Avvalroq Krasnov 9 nafar Moskva prokurorini ishdan bo‘shatgani xabar qilingandi. Uchta tuman prokuraturasi hamda bir qancha viloyat idoralari rahbarlariga nisbatan buyruqlar imzolangan.