Rossiya Favqulodda vaziyatlar vazirligi maʼlumotlariga koʻra, Rossiyaning Tambov viloyati Kirsanov shahridagi 5 qavatli uyda gaz sizib chiqishi oqibatida portlash sodir boʻlgan. Natijada 3 kishi halok bo‘ldi, 5 kishi jarohat oldi.
Ma’lumki, voqea Kommunistlar ko‘chasida sodir bo‘lgan. Portlash natijasida binoning 4 va 5-qavatlari shikastlangan. Hodisa 150 kvadrat metr maydonni qamrab olgan va yong‘in o‘chirilgan.
“Favqulodda xizmatlar voqea joyida ishlamoqda va jabrlanganlarga yordam bermoqda. Uyning evakuatsiya qilingan aholisi uchun 60 o‘rinli vaqtinchalik joylashtirish markazi tayyorlandi”, — deyiladi xabarda.
Shu bilan birga, hududiy tergov qo‘mitasi tomonidan Jinoyat kodeksining 109-moddasi 3-qismi (ehtiyotsizlik tufayli 2 va undan ortiq kishining o‘limiga sabab bo‘lsa) bilan jinoyat ishi qo‘zg‘atilgan.